لا تمثلني

أني خترت نخون.. 
و خنتك..
خنتكْ خاتر إنت تحبني.. 
ما تبدّلنيش..
خنتك خاتر وفيت بوعودك و مخليتنيش..
خاتر تحكيلي كل شي ما خبيت شي ،، ُخنتك على خاتر انت ما خنتنيش..
مخلتنيش نحسْ الي انت تنجم ترميني ،، تبعدْ و في صباح مالصباحات منلقاكش ،، خنتك خاتر عمرك ما قتلي لا ،، على خاتر كل ما تجرحني بكليمة تجري تجيبلي الدوا و أني نحب نذوق الوجيعة.. 
خاترني مالفرحة تصقمت و راحة البال رجْعت تعملّي جوجمة..
خاترك ياسر حنين ، لين غرقت و حبيت نتنفس شويّة شر.. 
و خنتك..
ما أحلاه إحساس..
نتكى على صدر ماهوش صدرك و ريحة موش كي ريحتك و كل شي موش متاعك.
ما أحلاه ،، ما أحلاه كلام ،، بوسات وسط المنام كلاني بلهفة بالقطعة بالقطعة ،، دار و زار تراكن بدني زنقة زنقة و رشمني بالطرف بالطرف ..
ايه خنتك ،، خاتر كنت ساسْ ،، كنتْ داري ،، مخدتي ،، صوتي و سكاتي.
خنتكْ خاتر صنتني و حبيتني.

شقاعد تحسْ انت تو؟ 
ميّت؟ مقهور؟ 
ولا طرفْ الغرور الي مالي بيه جيوبك تفرت فالهوا؟ 
مالا تعرفش كيفاه؟

أني خنتك قبل ما نعرف إلي انت تخون.
تنجم تحسبها واحد بلاش.