روح حية

مانيش باش نحكي بإسم الحب و الإنسانية .. باش نحكي بإسم طفلة روحها حية .. بإسم ذكرايات إلي في يوم ولات منسية .. باش نحكي على عباد كانو في نهار فرحة قوية .. باش نحكي عليك يا خويا يا غالي يالي تصويرتك مازالت في بالي .. هاني باش نحكي و نوصف حوالي بعد ما فقدتكم و ضاعت معاكم أمالي .
يا خواتي راكم برشا مش شويا .. يا خواتي راكم عمركم ما كنتو حاجة إستثنائية .. يا خويا يا مزيان راك كنت في حياتي رمز الأمان .. وينك يا خويا وينك يا عشيري وينك يا سر فرحتي وينك يا حنين وينك يالي معندكش بديل .. خليت قلبي في حرقة و ويل .. خليت حياتي مالوجيعة تميل و قلبي من الحزن يسيل .. و توا أني شكون بيا و كيف نحزن لشكون شنمد يديا ، لشكون شنحكي و نفرغ قلبي و مع شكون شنتعارك و نعدي وقتي .. شكون باش يكونلي صديق في أوقات الضيق ، شكون باش يكونلي عشير و في قلبي أمير .. شكون باش يقلي نحبك و نموت عليك و أحلى منك عمري ماريت شكون باش يقلي عمري ما نخليك و أني حياتي كلها بين يديك .. كي يسألوني شعندك خوات ، نقلهم عندي خواتي أما ماتو .. 
تعرف قداش توجع و قداش تقتل هالكلمة .. تذبح .. تعرف قداش تشويني و تكويني .. قداش نحس روحي مقهورة و مذبولة ،، يا خويا وينك وين مشيت يا خويا كيف ريت جثتك مسبولة حسيت شخصيتي مجهولة ..
شنوا طعم الدنيا بعد ما خسرتكم يا خويا و يا بويا ..

أه يا روحي حرقتي عليك كبيرة .. ياخي لهدرجة أني قوية باش ربي ياخذكم الزوز .. و يخليني نبكي في حيرة .. يا عزيزي مش قتلي الدنيا كبيرة .. شبيني نحس فيها حفرة صغيرة .. يا خويا بعدك معاش إنسانية .. حاسة روحي بين وحوش برية .. مقهورة و مكوية و نتفرج عالنفاق ب عينايا .. وينك يا عزيز عليا .. منين جاك هالحب إلي عطيطهولي.. قلبك عمرو ماكان دوني .. يا خويا قبل ما تمشي ما خممتش قداش باش نتعب من بعدك .. يا خويا وينو وعدك .. راك كنتلي نعمة إلاهية .. نعمة مشات من بين يديا و غابت على عينيا ..