لحكاية مش حكاية حب

الحكاية مش حكاية كبرنا عالحب..
حتى كي كبرْنا مازلنا فالحب صغارْ.. صدّقني مش لازمْ نكتبلك جوابْ نقلّك فيه : 
نحبّك قدّ الضربات عالعود في غنا أم كلثوم و تكعريرها للكلام ،، قدّ حروف كلمة نحبك في غنا بوشناق و كلام درويش و محبة قبّاني لبلقيس..
نخبّيهولك تحت لباب ،، ورا الماصّو تلقى بلاصة حُمّيرْ .. 
و لا حكاية عشاء و شمع و لا روبة حمرة و بيت على بحر المالديفْ.. 
مش لازم زادة نحط فوشة سنوني بحذا فوشتك و نقسم دبشي بين داري و دارك و ناخو من بيتك تركينة نلوح فيها حاجاتي ..
و الحكاية زادة مش حكاية لازمني نكون في عينيك ديما مزيانة.. شبيها كرْشي دازّة على قدّام ،، و شعري المشبشب حتى كان خفت منو تو تستانس بيه ،، و عينيا المحوقة إحسبهم كحل طايح ،، هذا لكل ما يعنينيش..
و حتى شخيرك وسط نومتي البنينة نسمعو ضربات عود ،، و تشقليبك إيمين ويسار نحسبهم يبنّننو بيا .. 
و تنجم تفيق و تخليني راقدة و متعطينيش بوسة الصباح..
و تنجم تفيقني من غطاية نومي باش تهز مخدتك من تحت راسي .. 
و تنجم تقلّي قوم ارقد غادي هذيا بلاصتي ..
لحكاية مش هكا..
مش لازم تشريلي كادووات ،ْ، و لا تكتب عالفيسبوك كل يوم راني نحبها و فازات .. 
تنجم ما تهزْزنيش ،، و الكادووات متشريليش.. 
و الشمع ما تشعليش و ماكلة يديك متضوقنيش و مش لازم زادة .. 
متحبنيش. 
لحكاية مش حكاية حُب. 
حكاية إسمك إلي نسيت شنية مقيّد في تاليفوني.