مش لازم

مش لازم شعري يبياض معاك ونجيب صغاري منّك ونعمل عكّازي بجنبك، يكفيني إنّي عرفت إنسان في هبالك وحلاوتك وفنّك،، يكفيني إنّي كُنت السبب نهار م النهارات في ضحكتك،، يكفيني إنّي ألهمتك،، رجعتك تكتب رجّعتك تحب تقرى رجّعتك تأمّن بالحب،، يكفيني إنّي مشيت معاك للمجهول،، يكفيني إنّي وصلت نفهم إلّي في مخك قبل ما فمك يقول، يكفي،، يكفيني إنّا عشنا كل شي بالقوي الفرحة قوية والبكية قوية والغُش قوي والحُب قوي وكل شي عشناه مڨربع داخل في حيط.. 
يكفيني إنّي كنت ولو للحظة جزء منك،، يكفيني إنّي سكنت فيك إنّي تنفستك إنّي حفظتك إنّي وليت قطعة من قلبك وعقلك وعينيك..
يكفيني الصوت إلّي ما ننساشي،، الوجه إلّي مستحيل نغلط فيه، اليد إلّي ما نرتاح كان لشدتها والتصاور إلّي تذكرني إنّي ما صنعتكش من وحي الخيال..