كنت صغيرة و منعرفش..

كنت صغيرة و ما نعرفش ..
فيبالي الحب كيما الكتب ،، ورده و سماء و بحر ،، و طفلة تترنّح بين يدين طفل ،، فيبالي الحبّ كلمة حلوة تتقال تسكن في البال ،، تحلم بيها ليل نهار و تبقى تعاودها في سرّك كيما محفوظات الصّغار ،، فيبالي الحبّ ضحكة و فرحة و تزعبين ،، و هاك بوسه مالخد و الجبين ،، و أشطح بين يديا أني حبك الحنين ،، و ما تخافش هاني معاك نحميك حتّى مالعينين ،، فيبالي الحبّ يبدى ببوسة مسروقة على غفلة ،، و يوفى بتصديرة و زيطه و حفلة ،، فيبالي الحبّ ما يعرفش خسارة ،، عندو ديما الحلّ و الدّبارة ،، فيبالي الحبّ ما يوفاش ،، و العاشق ما ينساش ..
كنت صغيرة و ما نعرفش!
و اليوم كبرت ،، و خسرت و الحبّ بكاني و هجرت ،، و عرفت الحقيقة ،، إنو الحب مش كلمات رقيقة ،، و توحشتك و نحبك كل دقيقة ،، إنو الحبّ مش لعبة بين يدين الصغار ،، الحبّ للرجال و الحراير ،، للكبار كبار القلب و المخ ،، ناس لاتخون و لا تخاف و لا ترخ ،، ناس تضحي و ما تكذبش ،، ناس توفي و ما تغدرش ،، الحب للرجال تهد على خاطرو الجبال تحلم و توصل و تبدل الحال ،، مهما كان صعيب و محال!
الحب للمرا القويّة ما تخافش مالزمان ،، مرا ديڨورديّة حاذقة و مثقفة و مڨدية تاقف معاه في محنتو و ما عندهاش مزية و تدلل بين يديه مالجنة حوريّة ،، الحب للمرا المهبولة تحلم بعيشة مزيانة و ماتاقفش كغيرها مشلولة إعاقة فكر و خوف من عادات خلاتها تافهة بهلولة ،، مرا تمّن إنها انسان يستحق يحلم و يعيش تحلم و تقدّم و معاك عشها تبنيه بالريش ريش جناحاتها مش لازم تطير مادام تحبك إنت السماء و السقف و الخير.
كبرت و عرفت إنّي ما حبيتش كي حبيت ،، و إنو حكاية صنعتها بورقة و ستيلو و شوية كتب و رحل و أني توا حبيت و هو تعب أما الحب الجديد مش كيفو ،، تعبو تعبي و راحتي كيفو ،، فرحتو غايتي و سندي طيفو ،، الحب الجديد مش كلام أفعال ،، هذاكا علاه قلت الحب للنساء الحراير و الرجال ..
كنت صغيرة و مانعرفش ..