نغير عليك

نغير عليك ..
أي و الله نغير عليك .. من نسمة الليل .. من تعب النهار  .. من التخلويض والخنّار .. و من تخمام يهد الحيل ..
نغير عليك ..
من ليّام و لعوام .. من الدوام إلي فكْ لمنام .. ملي نحبّو فيك و قالولي حرام .. و نغير عليك ..  و نكتبلك .. و نكتب عليك برشة كلام .. و نرجعلك من شطر الثنية .. و نغنيلك غناية مشتهية .. قداش حبيتك وهويتك .. و قداش واتيتني و واتيتك .. و قداش على حيوطك قريتك .. و قداش نحيت من روحي و عطيتك .. و قداش في بردك أني إلي غطيتك ..
أي نغير عليك ..
و ما نحملش كلمة فيك .. حتى كي ماعندكش كلمة .. حتى بعد ما ذبالت الحلمة .. و هربت منك و ملاّ عملة .. غدوة إلي حكيتلي عليه ستنيتو .. و وجعي منك مازلت ما نسيتو .. و هاني نكتبلك بروحي .. بلاش ستيلو .. وبول عليه لعمر .. إلي تعدّى وكليتو .. فماش ما تفيق وتفهم .. إلي جرحي منك محبة و هبال .. و أني باقي مكبشة .. نحب فيك و لمحبة مزالت تسال ..
بلاهي سؤال .. كيفاش تحبني مانحكيش عليك .. و أني قد ما كفرت بيك .. نقعد نرجعلك و نعيش بيك .. بش تخليني نبكي عندك .. وتسيبني نغير عيك ..
نغير عليك ..
و غيرك ما يهنالي .. وغيري ما يواتيك .. و طير ڨرنك منّي .. توة ترجّعلك شاهد لعقل جواجيك ..
وباقي نغير عليك ... وقد ماتطلبش ... ديما نعطيك ..
وديما نغير عليك ...