إيجا نفرشلك روحي ‏

إيجا نفرشلك روحي ..
و نسقيك من شفري ..
ونفديك بهيجة صغري ..
و نعزك بتعنيقة ..
تخرفلك حكاية عمري ...

إيجا نغطسو في لحظة سكات ..
بعيد على العينين المغطية بالكره ..
بعيد على الكلامات ..

إيجا نهزك نحمّلك ..
نطير بيك .. لثنايا نراها واسعة في ممّو عينيك ..

إيجا نتونس بيك ..
نكتب كتاب مناماتي ..

إيجا ندللّك و نتدلل عليك ..
و كي تتنبز نتدكك عليك ..

إيجا نصورو و نغنيو ..
و على سحابات السماء نتكاو و نطيرو ..
و تسحرني و نسحرك شبّيك لبّيك ..

إيجا نوشوشلك في وذنك ..
نشبشبلك شعرك ..
نلونلك دهرك ..
و كي تتنهد و تشدك البكية ..
نقلك أسكت إحشم ..
راني روحك راني ظهرك ..

إيجا نخلبزو و نبلبزو ..
و نڨزو في ڨلت الماء تحت المطرة ..
ساقي حفيانة تعنق ساقك تدفيها مالندوة ..

إيجا نعبدك و تعبدني ..
و كي تهزني الريح تخطفني ..
و منك تقربني و ما تهربني ..

إيجا نعيشك كيف ما إنت ..
إنت سلطان و تحطني في روحك سلطانة ..
و تلبسني كي شركة المرجانة ..
لا تبعد عليا و لا نسلّم فيك ..
تولدت عزقة من صلب الزمان ..
و في لحظة منام يتحب في طريقك ترميت ..
خوفي من الدنيا في حضنك نسيتو و تهنيت ..
بعد الضعف قويت ..
و كي سحرتني ضحكتك ..
رتحت بعد تنهيدة المواجع ..
بحلاوة كنينك تغريت وتبليت ..

إييييه محلاها السرحة كي تتعلم تمشي على ميزان خطاويك ..

زعمة نطلعشي عشقتك ؟ 

ولاّ بالك سخفتك ؟

خايفة نجيك ..
و نهرب من دنيتهم لجوف جواجيك ..
هاني سكت .
و خليها بيناتنا دقة روح تنعوش ..
و خليه سكاتك يقتلني كي يبربش ..
يزي ما كتبت و خطيت ..
تي يزي ما هدرت و حكيت ..

وراسك .. عييت وتهدّيت ..

إيجا نفرشلك جروحي.. 
فماش ما نعاود نلقى روحي ..