حية و لعمر مش بلاش

حتى لوقتاش ؟
الوقت ياخذ ما يعطيش وما يستنّاش ..
حتى لوقتاش ؟
تصبّر روحك وتستنّى بش ما تنساش ..
حتى لوقتاش ؟
تقعد تبّع فلّي قال وتعزّي فلّي ما بكاش ..
حتى لوقتاش ؟
تقول غدوة يتصلّح الحال و غدوة لتوّة ما جاش ..
حتى لوقتاش ؟
تعدّيها بالغصّة و التنهيدة و الوجع باقي ما تعدّاش ..
حتى لوقتاش ؟
تحلم بمنامة جديدة و تطمّع في روحك بلّي مفمّاش ..
حتى لوقتاش ؟
ترميها عالزمان وتقول برّه نسهّلها و ما نصعّبهاش ..
حتى لوقتاش ؟
المنڨالة ماشية وتقدّم و إنت مازلت تقول ساعة لهنى عهدك بيها ما تبطاش ..
حتى لوقتاش ؟
بش تقعد تحسب و لحساب عذاب موذي ما يسواش ..
حتى لوقتاش ؟
بش تاقف نادم تغزر وراك ..
وقدّامك ثنية مزلت ما تعرفهاش و ما مشيتهاش ..
حتى لوقتاش ؟
بش تقعد تسأل بلا جواب يبرّدك و النار تڨدح ما تطفاش ..
حتى لوقتاش ؟
بش نقعدو متباغضين ما تسامحناش و الدنيا تلعب بينا و المكتوب نازل علينا ..
وباقي ماتربيناش..

يزّي إلّي فينا وإلي تعدّى علينا و خلّي إلي بش يجينا حكاية بالسترة ما تتعرّاش..
الملامة ولات رزينة وما تواتيناش ..
بلّي بش تعكسنا و تعفس فينا تقعد بلا بينا ما تحياش ..
أحنا ريّاس لفلوكة ..
وبلّي لطختنا الموجة ما نجّمتناش ..