في ‏خيالي

نفركسك ...

ونقلب عليك الدنيا سافيها عاليها ... 

ونسأل عليك الي يضحك وإلي يبكي عليها

وإلي عايش كذبة وحالم فيها ... 

ونلقاك ...

وبالسرقة نهواك ...

ونتعشّق ضبابات وحشك 

وغيوم سماك ... 

نشتهاك ...

كي كعبة توت حمرة دم ...

كي غناية لمنام وغلبة لوحم ... 

نحبك ...

كي النار الشاعلة في عبّك ...

كي تبخنيسة المطر

من بركة ربي وربك ... 

نحبك ... 

بالسيف عليك 

نعن والديا قبل والديك ...

نحبك ... 

نبعد ونرجع نجيك ...

ونطبع روايحي في وسط جواجيك 

نتوجع فيك ومنك ونخرفك 

نتفطم عليك ونحكيك ...

ونخرفك ونغنيك ... 

بعرقي أني كلت عليك 

ومن عينيا نحرسك ونرقيك ... 

ومكنوني يشيلك ويدللك ويعانيك ... 

نكرهك ...

وقت الكره فال ... 

وقت العشق هبال ...

نخطفك مني ...

نفكك من هوايا 

من ضحكة هنايا ...

من جاشي المطبوع في لمرايا ...

نخطفك ليا 

من تدندينة غناية 

ونخطفك حذايا ... 

نقتلك ...

بالعرق مشنوقة مشقوقة ...

بسخانة روحي محروقة ...

شڨلابة تتقلب كي الموجة على فلوكة ... 

نصنعك ونستويك ...

من حفنة حروف ...

ونكميك في تنهيدي إلي عليك ملهوف ... 

ونسكت ...

ونسكتك 

وقت نتفكرك خيال مش بلحق ... 

يشيح حباري 

ونتفكر إلي كلو كلام كفنو ابيض لورق ...