توحشتك

غنّى بوشناق عليا وسمّاني نسّاية 

أما نحلف براسك

 الي ما نسيتش لي انت اول حرف في لحكاية 

لحكاية الي تكتبت باوّل حرفين من اسمك

الي حبّتك تكون ليّا ونكون اني قسمك 

هاك لحكاية 

الي قد ماتخبّات عمرها ما تمحات 

والي قد مابكات 

ما هفتتش وزادت تحكات 

وقدّاش 

تعبت وتهدّيت

بلعت وغصيّت 

تكبّيت وعملت روحي تعدّيت 

اما والله مانسيت :

فمّي الي شاح 

وقلبي الي طاح 

وكلامي الي راح 

كي قتلك اول مرّة : راك حب حياتي في الصباح و في العشية

 راك انت هو النية 

راك انت البوسة المشتهيّة

راك انت روح كل شجرة عرضتنا في الثنيّة 

ما ننساش ...

مسّة يدّك 

وحرارة كفوفك 

على كفوفي ما تطفاش 

ماننساش ...

عزقة في الروح 

تتبلع مع الريق وماتتحكاش 

ماننساش ...

كي نغمّض عيني بش تبوسني 

ونحسب للعشرة ونغلط في لحداش 

ماننساش ...

كيفاش كتبنا 

مكتوبنا بالكلمة وبالسطر 

وورّقنا صفحة بيضة

صوّرنا فيها الي بقالنا مالعمر 

ماننساش ...

الدنيا الي لمّتنا 

وزرعتنا شوكتين في حلق المر 

وشبعنا من بعضنا حتى كي قتلنا الشر

خليني نسّاية ...

ناسية عينيا الي عمات

من فراقك وما عاد تتحل

وكنين مات عليك وزاد تسل 

وزيد غرّقلي جرحي 

وهدلي حيلي

وحيّرلي دليلي  

تتعنّت وتدور 

وترجع في القلب 

فتيلة تنوّر ليلي 

ميسالش ... خليني نسّاية

آما عمرها شمسي 

ماتنسى تتصدّر في سماك 

وعمرو شعري

ما ينسى الي هو غطاك

خلّيني ناسية روحي الي حلفت بشبابك  

خلّيني ناسية ولفي المزروع في ترابك  

يدور الوقت 

وماينساش يعطيك برجك وحسابك 

نسّاية ... ونزيد ننسى 

الي كنت نهار اني  سترك وبابك 

ونسّيتك في الغالين من حبابك 

نسّاية ... ويلعن بو الي جابني و جابك ...