أني معاك انت مش أني
يا زهونا
يا غنانا
يا هبالنا
يا مغنانا
يا شهاوينا العريانة
يا غزرتك السكبانة
يا كفوفك
يا شفايفك
العطشانة
يا كمالة هوانا
ووحش ملقانا
يا شعرك
لمغطّي عينيك
يا لهفة الوحش في جواجيك
يا تجيني
يا نجيك
يا تقتلني
يا نحييك
يا نبرى منّك
يا نزيد نتبلى بيك
يا نسيّبك
يا نتبّع خطاويك
يا مبن شفايفك
و تهبلني كي ترمش شوافرك
وكمالة عمري على حجرك
يا عضّة في رقبتك أمارة
يا غزرة من عينك زعمة زعمة حزّارة
وكمالتها سكات حكاية هدّارة
يا تلبسني
يا نعرّيك
يا تفكني منّي
يا بروحي نغنيك
يا تجهّلني
يا نقرّيك
يا تسيّبني
يا نقسم معاك نفس رواريك
يا تسلسلني فيك
يا نغطّيك
يا تعشقني
يا نورّيك
يا مهفّ
يا الدنيا متاعهم
وانت في كفّة
يا حب
يحب عالشفّة
يا نتخبّى في شونك
يا بيديك نتدفّى
يا إنت
يا أني
يا آخر نفس
كتبتك بيه وزاد قرانا
ورجعنا عقاب الليل
لزهونا وغنانا
أني ليك رعشة
وبرشة حنانة
وأني معاك إنت ... مش أني...
Commentaires
Enregistrer un commentaire