توحشتك 2

و توحشّت إنْسَرْسَطْلِكْ أخباري

و إنصوّرلك ضحكتي في كلامي

وتوحشّت تقلّي دمعتك مفضوحة

فاش تخبّي و فاش إدّاري

و توحشّت الرّيق في خنّاري

و توحشّت نحسبلك النّجوم في عقاب الليالي

و توحشّت حطّتت يدّك على قلبي

و إنقلك فيه كان إنت و أمّي

و توحشّت يدّي السّارية في يدّكْ

و توحشت الرّعشة إلي تلبّكْ 

و توحشّت صياحي في بيتك قببْ

و توحشّت بوستك من غير سببْ

و توحشّت سكاتك و تلميحكْ

وتوحشّت تڨنڨينك وتلحليحكْ

و توحشّت ملامك و تغنيجكْ

ومازل في خشمي ريحة شيحكْ

ومازل هل القلب يغنّي بإسمكْ

ويحلم بشوفت طيفك

و توحّشتكْ

قد وحش الضّنى ﻷمّو

و قد ما لفقير توسّد همّو

و قد ما حبّات قمح في لحصاد تلمّو

و قد ما في السّماء نجوم لمعو

و توحشّت في ظلام الليل إنجيكْ

و مع خيوط الفجر نروح وقتلي روحي تناجيكْ

و توحشت نكرهك و إنسبّكْ

و كي تغشّشني إناديك بإسمكْ

و تقلّي أسكت و إيجا توسّد حضنكْ

و دفاك كي تقلّي نحبّكْ

و توحشت الطّريق إلي يرجعني ليكْ

و سر الكلمة إلي ترضّيكْ

تي باللهِ كيفاش إنرضّيكْ

بعدنا أما ديما متوحّشتك و نحبّكْ 

يقولو الوحش ولا الأذى

وقيّت ندعيلك و ندعي عليهْ

يعطيك حب الدّنيا و يعطيه عزا

مش كل من حصد محبّتو لقا

و عمرو ما كان الكَيْ آخر دواء

و عمرها الحلمة ما كان حدّها سابع سماء

ومش كل من قال حبّيت كيفي تبلا.