نحبنا

نحبّنا 

كل ما يجن اللّيلْ 

و يتلحفني في ظلامو

نحبّنا كل ما نحل عينْ

تتغمّض عينْ 

و كان تصاورك يبانو

نحبّنا في وسط التعبْ

و المشاكل من غير سببْ

وفي ريحة قديم كتب

و عكس الدّنيا

و قهرة لصحابْ

و غزرة عطشان لسراب

نحبّنا و كل ما يتسكّر بابْ

نحفرو ألف خندق و سردابْ

وما إنقولوش تعبنا

لا نحاسبو الدنيا 

لا تحاسبنا

و ناديك كي ينعس الليلْ

نسكروا بهمومنا و عرقنا

و نحلفو شي ما يفرقنا

نحبنا وقت النوْ

نحبنا في فتلة الضوْ

لين الملح يولّي حلوْ

لين لبحر يشرب موجُو

لين لخلا يشق فجوجُو

و السرج يطرز وحدو حروجُو

لين الميت بالحي يتلاقى

لين تتقطع من بلادي السرّاقهْ 

لين يسرح عالبر الحوتْ

لين يتحرّم عالحباب الموتْ

لين بالعدل يتقسم القوتْ

نعشقنا و الرّب إلي خلقنا

و نفخ في جمرة حبّنا

نحبّنا